فريدة سيف النصر .. تكشف سبب تسمية سمير غانم لها بـ “فريدة سيف الرقص”

كتبت: آية عامر

قالت الفنانة فريدة سيف النصر، خلال لقائها مع الإعلامية إنجي علي، عن مشاركتها في مسلسل العتاولة: أتمنى النجاح لكل فريق عمل مسلسل العتاولة بجد اللي بيحب ربنا بيعرف المحبة وبيحب كل اللي خلقه ربنا والروح اللي حاطتها في أي جسد، ما دام جواكي رحمة يبقى جواكي حب، وأكيد ربنا هيبقى في ضهرك، وأنا بقعد أشكر ربنا وبتخض من الحب وبلاقي مظاهرات لشباب تحت البيت عاوزين يتصوروا معايا بعد ما عملت دور سترة، فأنا بقول لهم إني بحبهم رغم إني زعلانة لأني حبيت سترة وماتت للأسف.

ووجهت الفنانة فريدة سيف النصر الشكر لباسم سمرة لذكره لها في العديد من البرامج قائلة: شكرا يا أستاذ باسم لأنك في كل الأماكن بتجيب سيرتي.

و تذكرت الفنانة فريدة سيف النصر خلال لقائها، ذكرياتها الجميلة مع الفنان الراحل سمير غانم، وتحدثت عن الأعمال الفنية
التي جمعتهما.

وقالت فريدة: “اشتغلت مع سمير غانم مسرح وسينما، وكنت بحب الرقص والغنا جداً، في مسرحية اسمها “الخوافين” قدمت فيها كل أنواع الرقص هندي، روسي، إفريقي، وسمير غانم كان مسميني “فريدة سيف الرقص”، كنت أي رقصة اتدرب عليها أقدر أعملها.”

وأضافت: “سمير غانم ودلال عبد العزيز مرحلة من حياتي مهمة، كانت دنيا سمير غانم تخرج معايا وهي صغيرة مع ابني، كنا عائلات مع بعض وحب كبير بينا.”

كما رفضت فريدة سيف النصر إطلاق لقب “أفلام المقاولات” على بعض الأفلام التي شاركت فيها، مثل فيلم “424”، وقالت: “النهاردة لما تحبي تقللي من حد تقولي كلام عبيط، يعني إيه مقاولات؟ فيلم “424” من إنتاج فاروق صبري ودا تاريخ سينما، هما بيحاولوا يفشلونا، لو عايز تقلل من حد تقلل من الحقبة كلها، الأفلام دي كان بيشارك فيها نجوم.”