كيف تتعامل مع الشريك النرجسي وكيف تحمي اولادك منه

كتبت: رنا الخياط

يقدم احمد امين متخصص في العلاقات الانسانية، كيف تتعامل مع الشريك النرجسي وكيف تحمي اولادك منه:

انتشرت كلمة “نرجسي” على نطاق واسع في في الفترات الاخيرة في وصف الأشخاص المتمركزين على الذات الذين يبدو أنهم يريدون دائما أن يكونوا في دائرة الضوء. ومن المعروف ان اضطراب الشخصية النرجسية أكثر قسوة وحدة عن وصف الناس ليه. وإذا كان شريكك في الأبوة والأمومة نرجسيا، هتلاحظ ان الشريك النرجسي بيتعمد تجاهل حدودك الصحية وكسرها.

وبيتعمد اظهار عدم الاحترام ليك ودايما هتلاقي غضب شديد من الشريك عندما تنتقده او تعترض علي كلامه واحيانا بيكون صعب التوصل الي حلول وسط معاه ومن الصفات النرجسية بردو هو الشعور المتضخم بالعظمة والأهمية الذاتية، وده بيخلي الشخص النرجسي يشعر أنه هو اكتر أهمية من الآخرين ويفتقر إلى التعاطف، ويشعر بالحاجة إلى قدر مفرط من الإعجاب، والشعور الكبير بالاستحقاق.

وفي مقالنا النهارده هنتكلم علي مجموعة من الخطوات الضرورية انك تستخدمها للتعامل مع الشريك النرجسي و ازاي تحمي اولادك منه:

١. تقبل الامر انه شريكك نرجسي وخلي في حساباتك انه صعب جدا انه يتغير او يغير من صفاته النرجسية السيئة والسلبية واقبل فكرة انه عليك المشاركة في الأبوة والأمومة مع شخص لا يعجبك وهنا لازم تضع حدودا. يعني خليك واضح ومحدد في طريقة التعامل اللي انت بتقبل فيها في العلاقة ولا تسمح للشريك النرجسي انه يكسرها ولا يعبرها. اتفق معاه علي خطة الأبوة والأمومة. يعني مثلا حدد معاه ازاي ومين هيوصل الأطفال الي المدرسة، وايه طرق التعامل مع أنشطة ما بعد المدرسة والاجازات. وبعد الاتفاق اكتب الخطة دي، ووقع عليها انت والشريك والتزم بها.

٢: حاول انك تقلل من التواصل والكلام مع الشريك النرجسي. لان الشريك النرجسي هيحاول ارهاقك دايما بتفاصيل كتير غير منطقية وغير صحيحة وممكن يفاجئك انه محتاج منك اجابة فورية علي بعض الاشياء في محاولات للسيطرة عليك وعلي رأيك. فحاول انك تستخدم في الوقت ده الرسائل كوسيلة للتواصل علشان تاخد فرصة انك تفكر قبل الرد.

٣: خليك هاديء لما يحاول شريكك النرجسي ينتقدك او يستفزك علشان تغضب. فحاول دايما أنك تخليك هادئ. ابعد عن انك تدخل في الإهانات أو اللوم. وراعي دايما وانت بتتكلم معاه انك تستخدم لغة واضحه يعني كلامك يكون واضح وتستخدم كلمات بدون عاطفة، ولغة جسد قوية، وصوت قوي وليس عال.

٤: افهم دايما ان الخلل مش فيك انت او في شخصيتك ولا تاخد كلامه علي شخصك ولا تعطي ليه الفرصة انه يقلل من ثقتك بنفسك.

ومن الضروري جدا انك تعرف ان فيه بعض التصرفات والافعال اللي لازم تبعد عنها زي مثلا:

١: لا تجادل مع الشريك النرجسي كتير واستخدم طريقة الصخرة الرمادية في التعامل يعني حافظ على إجاباتك علي كلامه تكون واضحة وقصيرة، دون عاطفة. لا تشرح نفسك أو تعطي الكثير من المعلومات عنك وعن اصدقائك وعملك.

٢: لا تخف منه. وافهم ان الشريك النرجسي بيبحث دايما عن الشكر والثناء والمدح المستمر ولما يفعل شيء جيد اشكره ولكن التزم بحدودك الصحية في العلاقة.

٣: لا تحاول التحكم في كل شيء علشان تقلل الصراع بينك وبين الشريك النرجسي ولا تشرك الطفل في صراع بينكم وده المفروض يخلي طفلك في امان جسدي وعقلي وعاطفي اكتر.

وعلشان تحمي اولادك لازم تخلي بالك من الخطوات دي:

رقم ١: اتكلم مع طفلك. وعلم طفلك أن سلوك والده يتعلق بذلك الوالد، وليس به.

٢: ماتقولش لطفلك اشياء سلبية عن شريك الابوة او الامومة النرجسي. وحتي لما تيجي تتكلم مع اي شخص من العائلة او الاصدقاء راعي الالفاظ اللي بتستخدمها واللي ممكن يسمعها الطفل.

٣: تابع طفلك باستمرار ولاحظ اي علامات بتدل علي اذا كان فيه سوء المعاملة زي مثلا الضرب او التعنيف.

٤: خليك والدا صحيا. يعني حافظ علي انك تكون قدوة جيدة لطفلك.